Nin "arre" nin "xo". Así pode resumirse a posición política actual de Xoán Gato. Como ten todo o dereito a ter ambicións políticas, como calquera, non vou facer comentario algún sobre o seu desexo de ser alcalde de Ferrol, aínda que non sei se o resto de lectores deste periódico non estarán un pouco fartos do baile de declaracións das últimas semanas: preséntome, non me presento, non sei se me vou presentar, débome á Cámara, este non é o momento, preséntome, teño que falar coa Cámara, a ver se me vou presentar, etc. É a súa forma habitual de acadar espazo nos medios, así que, se ao periódico e aos seus lectores non lles amola, eu non digo nada.